Станіслаў Шушкевіч адмовіўся сустрэцца са студэнтамі ЕГУ

Былы старшыня Вярхоўнага Савета Беларусі  XII склікання Станіслаў Шушкевіч адмовіўся ад сустрэчы са студэнтамі Еўрапейскага гуманітарнага ўніверсітэта, нягледзячы на запрашэнне Студэнцкага прадстаўніцтва ЕГУ.

Прэзідэнт Студэнцкага прадстаўніцтва ЕГУ Максім Мілто: “Першапачаткова Шушкевіч пагадзіўся сустрэцца з намі 10 лютага дзеля таго, каб абмеркаваць крытыку ЕГУ і саміх студэнтаў, выказаную перад Калядамі. Тым не менш, калі я звязаўся з ім, каб пацвердзіць сустрэчу, Станіслаў Станіслававіч стаў нечакана настойваць на запрашэнні ад адміністрацыі ўніверсітэта”.

Нагадваем, што ў інтэрв’ю літоўскаму штодзённіку “Lietuvos rytas”, якое было надрукавана 19 снежня 2011 года, Станіслаў Шушкевіч адзначыў, што ЕГУ з’яўляецца антыбеларускім універсітэтам, а студэнты не валодаюць беларускай мовай.

Дарыюс Удрыс, прарэктар па развіцці і міжнародных адносінах: “Шкада, што С. Шушкевіч адмовіўся ад запрашэння [студэнтаў]. Нашы студэнты запрасілі Шушкевіча па ўласным жаданні дзеля таго, каб зладзіць канструктыўнае абмеркаванне выказанай раней крытыкі ўніверсітэта і студэнтаў. Грамадзянскі ўдзел і актыўнасць – гэта частка таго, у чым мы імкнемся пераканаць студэнтаў падчас вучобы. Мы шкадуем аб адмове спадара Шушкевіча”.

Студэнцкае прадстаўніцтва ЕГУ